Rusiye Federatsiyasınıñ Hakasiya cumhuriyetiniñ akimiyeti aprel 14-ni tabiat yanğınları neticesinde elâk olğanlarnı añmaq içün matem künü olaraq ilân etti. Soñki malümatlarğa köre, aprel 12-13 künleri 15 kişi elâk oldı, biñge yaqın mesken ev yandı. Region memuriyetiniñ malümatına köre, yanğından zarar körgenlerniñ sayısı beş biñge yaqınlaştı, 500 insan tibbiy yardım istedi. Bunı Radio Svoboda bildire.
Hakasiyadaki Şirinskiy rayonınıñ memuriy merkezi olğan Şira qasabası eñ büyük zarar kördi. Radio Svoboda mühbiri İgor Çigarskih qasabanı ziyaret etip, ilk malümatlarğa köre, qasabada dört yüz evniñ bütünley yanğanını bildire. Şirinskiy rayonında eki biñden ziyade zarar kördi.
Qasaba sakinleri viranelerni baqıp, qıymetli şeylerni toplaylar, mağazalardan malnı çıqarmağa tırışalar.
İlk malümatlarğa köre, yanğınlarnıñ sebebi keçken yıldan qalğan quru ot oldı. Ruzgâr ateşni tarqattı. Onıñ süratı saniyede 30 metrni teşkil etti.
Cumhuriyette yanğınlar er yıl yüz bere. Bu sene baarde vazit daa havflı oldı, çünki qışta qar az yağdı, baarniñ başı ise sıcaq oldı. Mart ayında regionda Üst-Abakan rayonında evler yanğan edi, bir qaç fermacı ve ev ayvanları elâk oldı.
Köylerni yanğınlardan qorumaq içün Hakasiya çöllerinde yolaqlarnı qazalar. Olarnıñ sayesinde bir çoq adam ve ev zarar körmedi.
Hakasiyanıñ aprel 12-13 künleri yüz bergen yanğından körgen zararı 5 milliard rubleden ziyadedir, dep tahmin ete akimiyet. Taqiqat komiteti «Eki ve ekiden ziyade insannıñ ölümine sebep olğan diqqatsızlıq» maddesi boyunca beş cinaiy işni açtı.
