Tam bir yıl evelsi, 2014 senesi aprel 13-te, Ukraina Milliy havfsızlıq ve mudafaa şurası (RNBO) Ukraina şarqında terrorizmge qarşı tedbirler keçirilmesini ilân etti. Böyle qarar Donetsk ve Lugansk vilâyetleriniñ bir sıra şeerinde başlağan Rusiyege qoltutuv numayışlarğa, silâlı taqımlarnıñ memuriy binalarnı ve militsiya bölüklerini zapt etmek ıntıluvlarına cevap olaraq qabul etilgen edi, dep yaza Radio Svoboda.
O vaqıt Ukraina prezidenti vazifelerini eda etken Aleksandr Turçinov bildirdi ki, Rusiye Federatsiyası Ukrainağa qarşı cenkke başladı. Aprel 14-te o RNBOnıñ «Terroristik telüke ve Ukrainanıñ topraq bütünligini saqlav qaluv boyunca acele tedbirlerniñ keçirilmesi aqqında» qararı ile bağlı buyruqnı imzaladı.
Birleşken Milletler Teşkilâtınıñ malümatına köre, Donbasstaki cenk areketleri aqibetinde 6 biñden ziyade insan elâk oldı. Evlerini terk etmege mecbur olğan insanlarnıñ sayısı 2 million insannı teşkil etti, olardan 1,2 million kişi Ukrainanıñ diger regionlarına, 700 000 adam Rusiyege köçip ketti.
ATO ve separatistlerniñ zararları tam belli degil. Baş ştabnıñ ilk malümatlarına köre, Ukraina Silâlı quvetleri 1,5 biñ arbiyni ğayıp etti.
Rusiye Donetsk ve Lugansk vilâyetlerindeki zıddiyette iştirak etkenini red ete. Ukraina reberligi ve NATO vekilleri ise Donbasstaki zıddiyetke alâqası olğanını isbatladılar.
Rusiyeniñ Ukrainağa qargı istilâsından sebep dünyanıñ bir sıra memleketi Rusiyege qarşı iqtisadiy cezalar kirsetti.
