Yalta sailinde Paşaliya munasebeti ile şeer sakini ve musafirlerini bedava tort ile sıyladılar. Bayram tatlılıqnıñ ağırlığı – 45 kilo, ziyafetni Yalta memuriyet başı Andrey Rostenko esabına pişirdiler, haber ete Qırım.Aqiqat.
Yalı kenarında cemaat ğıdalav ve ticaret noqtaları açılğan. Musafirlerni sıylamaqtan evel аziz Aleksandr Nevskiy adına katedral kilse papazı Kirill tortqa aziz suvnı septirdi.
Tortnı politsiya hadimleri sarıp aldı, ziyafetke irişimni «Yekâne Rusiye Yaş Gvardiyası»nıñ faalleri ile nezaret ete ediler. Bedava tortqa olğan nevbette esasen balaları ile ana-babalarnı ve ihtiyarlarnı körmege mümkün edi.
Yalta memuriyetiniñ başı Andrey Rostenko bayramğa kelmedi. Onıñ yerine Yalta sakinlerini şeer memuriyetiniñ başı muavini Yelena Perverzeva ve Yalta şeer şurasınıñ reisi Valeriy Kosarev hayırladılar. Soñkisi hayırlav sözlerinde Ukrainada barışıqnıñ olmasını tiledi.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
