Qırımtatar Milliy Meclis reisiniñ muavini Aslan Ömer Qırımlı 2014 senesi aprel 10 kününden Qırım Cemiyetinde baş vazifesinden vazgeçti. Bu aqta Qırım Cemiyetiniñ matbuat hızmeti bildire.
Matbuat hızmetinde qayd etilgeni kibi, Qırımda qırımtatarlarnıñ qanuniy aqlarınıñ temin etüvi meselelerinde halqara yönelişni inkişaf ettirüv zaruriyetten sebep vazifelerinden vazgeçti.
«Yaqın zamanda Qırımlı ekinci Bütündünya Qırımtatarlarnıñ kongressi ile bağlı teşkiliy suallerge ve kongressniñ nizamname leyhasınıñ azırlanuvına diqqat ayıracaqtır», – deyler matbuat hızmetinde.
Qırım Cemiyetiniñ başı vazifesine reberniñ muavini Nariman Ustayev keçti.
Qırım.Aqiqat bildirgeni kibi, iyül 31-den avgust 2-ge qadar Türkiyede Bütündünya qırımtatar kongressiniñ keçirilmesi planlaştırıla. Kongressni toplamaq qararı aprel 4-5 künleri Ankarada olıp keçken Türkiyedeki qırımtatar teşkilâtları platformasınıñ toplaşuvında qabul etildi. 2015 senesi fevral ayında Türkiyedeki 43 qırımtatar teşkilâtı ğayretini birleştirip, yekâne platforma çerçivesinde işbirlik tutmağa qarar aldılar.
Ekinci Bütündünya qırımtatar kongressi angi şeerde keçirilecek belli degil.
Qırımtatarlarnıñ milliy lideri Mustafa Cemilev kongress delegatlarınıñ yarımadağa qaytması ile bağlı problemleri ola bilecegini tahmin ete.
Birinci Bütündünya qırımtatar kongressi Aqmescitte 2009 senesi mayıs ayında olıp keçken edi. 800 delegat iştirak etti – 12 memleketten 160 qırımtatar cemaat siyasiy teşkilâtınıñ vekili. Kongress prezidenti olaraq Refat Çubarov saylanğan edi.
