Aqmescit videooperatorı Amet Ümerov bildirdi ki, aprel 11-de Ekstremizm ile küreş merkezine sorğuğa daa 6 kişi ketirilgen edi. Bunı o Qırım.Aqiqatqa bildirdi.
«Menden ğayrı anda daa altı kişi oturğan edi, olarnıñ bilgisayarları ve videotehnikası alındı. Olardan ekisi qırımtatarlarğa oşay edi», – dedi o.
Ümerov dedi ki, saba saat 7-de onıñ evine tintüv ile keldiler. «E» Merkeziniñ vekilleri patlav maddelerini ve silânı qıdırdılar. Bunıñnen beraber, Ametniñ bilgisayarında içtimaiy ağlardaki şahsiy mesaclarını oqudılar.
Tintüvden soñ onı Ekstremizm ile küreş Merkeziniñ idaresine alıp kettiler. Ümerovnıñ aytqanına köre, «E» Merkeziniñ hadimleri Ametniñ Aleksey Râbinin ile alâqalarını soradılar. Ümerov bu adamnı tanımağanını bildire, ve bilgisayar teşkerilgende bu adamnen mektüpleşüv tapılmadı.
Qırım.Aqiqatqa haberi olğan qaynaqnıñ bergen malümatına köre, «E» Merkezi Aqmescit sakini Aleksey Râbinin aqqında malümat toplay. Bu adam özü yapqan patlav maddesinden elâk oldı. «E» Merkezi vekilleriniñ malümatına köre, o, Qırımda mayıs 9-da teraktlarnı yapacaq edi.
Sorğudan soñ Amet Ümerovnı azat ettiler. Ümerov ömür arqadaşı, küçük balası ve ana-babasınen yaşay. Al-azırda videooperator Ekstremizm ile küreş boyunca Aqmescit İdaresinde buluna. Bir qaç yıl evelsi Amet Ümerov ATR telekanalınıñ operatorı olıp çalışqan edi. Şimdi ise toylarnı çıqara.
