Qırımtatar Milliy Meclisiniñ reisi Refat Çubarovnıñ bildirgenine köre, keçirilmesi belgilengen Bütündünya qırımtatar kongressini itibardan tüşürüv işine Federal havfsızlıq hızmetiniñ (FSB) hadimleri ve Rusiye Federatsiyasınıñ diger mahsus organları qoşuldılar.
Bunı o Facebookta yazdı.
«Belli olğan Goebbelsniñ tarzında olmaycaq laflarnı işğalcilerniñ çızmalarına oqalanğanlar seslendire...», – dep qayd etti Çubarov.
Onıñ aytqanına köre, Qırım akimiyeti kongressni toplamaq qararına açuvlana.
«Ekinci Bütündünya qırımtatar kongressininiñ künü ve yeri belgilengen soñ işğalcilerniñ ve olarnıñ semetdeşler arasındaki qoqlalarınıñ Qırımda işğalciler tarafından yapılğan ve yapılayatqan cinayetlerni gizlemek içün çoq millionlı qırımtatar diasporasını qullanmaq ümütleri bozuldı», – dep yazdı Çubarov.
İyül 31-den avgust 2-ge qadar Türkiyede Bütündünya qırımtatar kongressiniñ keçirilmesi planlaştırıla. Kongressni toplamaq qararı aprel 4-5 künleri Ankarada olıp keçken Türkiyedeki qırımtatar teşkilâtları platformasınıñ toplaşuvında qabul etildi. 2015 senesi fevral ayında Türkiyedeki 43 qırımtatar teşkilâtı ğayretini birleştirip, yekâne platforma çerçivesinde işbirlik tutmağa qarar aldılar.
Ekinci Bütündünya qırımtatar kongressi angi şeerde keçirilecek belli degil.
Qırımtatarlarnıñ milliy lideri Mustafa Cemilev kongress delegatlarınıñ yarımadağa qaytması ile bağlı problemleri ola bilecegini tahmin ete.
Birinci Bütündünya qırımtatar kongressi Aqmescitte 2009 senesi mayıs ayında olıp keçken edi. 800 delegat iştirak etti – 12 memleketten 160 qırımtatar cemaat siyasiy teşkilâtınıñ vekili. Kongress prezidenti olaraq Refat Çubarov saylanğan edi.
