Qırımdan mecburen köçip kelgenlerniñ teşkilâtları vekilleriniñ ekinci Bütünukrain qurultayı 2015 senesi mayıs 29-da keçirilecek.
Böyle bir qarar aprel 9-da olıp keçken «Qırımdan köçip kelmege mecbur olğanlarnıñ cemaat teşkilâtlarınıñ koordinatson şurası» cemaat birliginiñ toplaşuvında qabul etildi, dep haber ete Qırım.Aqiqat.
Cemaat birliginiñ vekilleri yañı reisni sayladılar. Kelecek üç ay devamında, birlikniñ nimzamnamesi belgilegeni kibi, Koordinatsion şurasınıñ reisi Sergey Kovalskiy olacaq – «Euromaydan-Krım» cemaat areketiniñ koordinatorlarından biri. Bundan evel reis vazifesini Qırım faali Sergey Mokrenüv eda etken edi.
Koordinatsion şurasınıñ birinci vazifesi olaraq Ukraina Baş prokuraturasına icra akimiyetniñ organları memurlarınıñ areketsizligine şikâyet olacaq.
Teşkilâtta qayd etkenlerine köre, memurlar cemaatçılarnıñ Qırımnı işğalden azat etüv ve qırımlılarnıñ aq-uquqları ile bağlı qanunlarğa kirsetilecek deñişmeler boyunca tevsiyelerine emiyet bermeyler.
Qırımdan mecburen köçip kelgenlerniñ birinci Bütünukrain qurultayı Kiyevde 2014 senesi mayıs 23-te keçirilgen edi.
2014 senesi mart ayında Rusiyeniñ Qırım işğalinden sebep bir çoq insan yarımadadan qıtaiy Ukrainağa köçmege başladı. Ukraina Fevqulâde vaziyetler devlet hızmetiniñ malümatına köre, 2015 senesi aprel 15-ke qadar Qırım ve Aqyardan 20 biñ 480 insan köçip keldi.
