Link açıqlığı

Rusiye ükümeti ve Qırımnıñ icra akimiyeti organları aprel 30-ğa qadar yarımadanıñ şimalinde «sıñırdaki» kiriş noqtalarınıñ eyiliştirilmesi boyunca tekliflerni azırlamaq kerekler.

Böyle bir emirni Rusiye prezidenti Vladimir Putin berdi, dep haber ete Kremlniñ matbuat hızmeti.

«Rusiye Federatsiyasınıñ Qırım federal okrugınıñ şimalinde yerleşken devlet sıñırında maşina kiriş noqtalarınıñ semereli ve tolu infrastrukturanıñ qurulması boyunca tekliflerni taqdim etmek kerek», – dep aytıla Putinniñ emrinde.

Vesiqada aytıla ki, tekliflerde Rosselhoznadzor ve Rospotrebnadzor işini köz ögüne alıp, qoşma areket yolaqları ve olarnıñ yerleştirilmesi içün yerler, teşkerüv noqtaları işiniñ eyiliştirilmesi olmalı.

Rusiye prezidenti Qırımnıñ Nazirler şurası ve Naqliyat nazirligine kurort mevsiminde turistlerni taşımaq içün naqliyat infrastrukturasını eyiliştirmege tevsiye etti.

Rusiyeniñ Qırım işğalinden soñ 2014 senesi mart ayında qıtaiy Ukraina ve yarımada arasında memuriy, asılında ise – tam bir sıñır peyda oldı. Qırım vaqtınca işğal etilgen topraq olaraq ilân etildi.

XS
SM
MD
LG