Aprel 10-da Yaltadaki «Skazka» ayvanat bağçasını özüni Qırımnıñ «halq imayesi» olaraq tanıtqan adamlar ziyaret etti.
Bunı ayvanat bağçasınıñ müdiri Oleg Zubkov bir sıra kütleviy haber vastasına haber etti.
Böylece, Zubkov Krım.Media agentligine bildirdi ki, arbiy urbada adamlar «halq imayesi» işareti ve «Donetsk halq cumhuriyetiniñ» bayrağınen maşina ile keldiler. Kelgenler «Skazka» kirişi ögünde park yerini ölçep, işaretler noqtalarını qayd etmege başladılar. Mında bulunğan iş adamlarına tezden bu yerde ticaret noqtalar qurulacağını bildirdiler.
«Pek arsız ve yüzsüz adamlar. Bir de bir vesiqanı köstermeyip, ayvanat bağçasınıñ müdirini qaba şekilde yolladılar», – dep ayttı Zubkov. Onıñ bildirgenine köre, bu ziyaret oña aydutlar zamanını añdırdı.
«Menim fikirimce, Rosselhoznadzornıñ tünevin aydınlatqan beyanatı ve bugünki vaqialar – aynı zıncırnıñ alqaları. Kurort mevsimi arfesinde cenk, onıñ maqsadı – meni iş adamını olaraq itibardan tüşürmek, «Skazka» ve «Taygan» işini toqtatmaqtır. Yarın arslanlarnıñ bağçası ögünde imayeciler turıp, bir kimseni kirsetmeseler, şaşırmam», – dep ayta ayvanat bağçasınıñ müdiri.
Qırımnıñ «halq imayesi» polkunıñ komandanı Sergey Turçinenkonıñ neşirge bergen malümatına köre, olarnıñ buña iç bir alâqası yoq.
«Polknıñ temsilcileri «Skazka» ayvanat bağçasına barmadılar. Qırımnıñ «halq imayesi» polku ticaretnen oğraşmay ve iç bir yerde, şu cümleden «Skazka» ayvanat bağçasında, ticaret noqtalarını qurmaycaq», – dedi o.
Qırım.Aqiqat Zubkov ile telefon vastasınen bağlanmağa tırıştılar, faqta onıñnen bağ yoq.
Rosselhoznadzor «Taygan» arslanlar bağçasında qanunsız alda çıqarılğan ayvanlar bar, olar ise telükeli hastalıqlarnı taşıy bileler, dep bildirgen edi.
