Aprel 10 künü Qırım akimiyeti Aqmescitte 2014 senesi mart ayında Rusiye yarımadanı işğal etkeninden soñ qabul etilgen Qırım Anayasasını tarqatuv aktsiyasını teşkil etti. Anayasanı soqaqlarda Qırım haber-poligraf tehnologiya institutınıñ studentleri tarqata edi. Vesiqa Qırımnıñ üç devlet tili – rus, ukrain ve qırımtatar tillerinde basılğan.
Qırımnıñ Rusiye ükümetiniñ içki siyaset ve informatsiya nazirliginiñ malümatına köre, eki saat devamında studentler Aqmescitniñ 10 farqlı noqtasında 2500 nushanı tarqattı. Umumiy tirajı – 50 biñ nushanı teşkil ete.
«Qırım haber nazirligi ile işbirlikte bulunıp, Qırım Anayasasını tarqatamız. Yarın Anayasanıñ qabul etüv yıllığı ola, insanlar cumhuriyetimizde öz aq ve mecburiyetlerini bilsin dep, bu aktsiyanı keçiremiz», – dey Qırım.Aqiqatqa student Maksim.
2014 senesi aprel 11 künü rusiyeli Qırım Devlet Şurasınıñ nevbetten tış toplaşuvında 8 bab ve 95 maddeden ibaret olğan Qırım Cumhuriyetiniñ Anayasası» qabul etildi. İşbu vesiqanıñ qabul etilmesini Qırımtatar Milliy Meclisinde takbih etken ediler.
