Ukraina juranlistleriniñ milliy bіrligi ve Mustaqil media-zenaat birliginiñ temsilcileri ukrain akimiyetinden işğal etilgen Qırımda Qırım jurnalistleri evlerinde keçirilgen tintüv ve Rusiye mahsus hızmetleri tarafından olarnıñ sorğusına cevap bermekni talap eteler.
Bu aqta ukrain media-zenaat birlikleriniñ umumiy beyanatında aytıla.
Beyanatta yazılğanı kibi, Ukraina devlet organlarnıñ reaktsiyası pek müim, çünki «bu kibi adiseler Qırımda söz serbestliginiñ sıñırlavını tasdiqlağan menfiy meyildir».
Şu cümleden, Ukraina prezidenti ve memleketniñ tış işler nazirliginden jurnalistler resmiy narazılıq notası ile seslenmege talap ettiler.
«Ukraina Baş prokuratura terkibinde teşkil etilgen QMC prokuraturasından – Qırımda jurnalistlerge qarşı qanunsız areketlerni alıp barğan mahsus hızmetlerniñ hadimlerine qarşı cinaiy işlerni açmaq ve olarğa nisbeten şahsiy cezalarnı kirsetmege talap etemiz», – denile beyanatta.
FSB hadimleri Tatyana Guçakovağa cumaaqşamı, aprel 9-da, saba saat 7.45 keldiler. Tintüvden soñ onı belgisiz yönelişke alıp kettiler. Tintüv aman-aman 10 saat devam etti. Guçakova вu yıl devamında Kiyevge köçken muarririyette çalışmağanına baqmadan, Ukraina jurnalistleriniñ milliy birliginiñ azası ola.
Malüm olğanı kibi, 2015 senesi mart 13-te Qırım jurnalistleri Anna Andriyevskaya ve Natalya Kokorinanıñ ana-babaları yaşağan evlerde FSB tintüv keçirdi. Bunıñ sebebi Tsentr jurnalistskih rassledovaniy neşirinde çıqqan maqale boyunca cinaiy iş oldı.
Böylece, Qırımda yaşamağan Anna Andriyevskayağa qarşı FSB Rusiye Ceza kodeksiniñ 280.1-inci maddesi boyunca «Krım» batalyonınıñ göñüllileri aqqında maqalesi içün cinaiy iş açtı.
Natalya Kokorinanıñ ana-babasınıñ evinde tintüv keçirilgen soñ jurnalistni FSB idaresine alıp kettiler. Onı iş boyunca şaat olaraq altı saat sorğuğa çektiler. Soñra ise bilgiyasayarını alıp, azat ettiler.
