Qırım Anayasası «insan ve vatandaşlarnıñ aq ve serbestligini qoruv ümdeleri» esasında tizilgen, – dedi Qırımnıñ şimdiki başı Sergey Aksönov cumaaqşamı künü aprel 9-da Qırım Anayasası Kününe bağışlanğan tantanalı tedbirde.
Onıñ sözlerine köre, Qırım Anayasasınıñ esas qaideleri üzerinde anayasa qurucılığı saasında ileri Qırım ve Rusiye eskpertleri, Rusiye Devlet Dumasınıñ deputatları, Federatsiya Şurasınıñ azaları, yarımadanıñ cemaat teşkilâtlarınıñ temsilcileri çalışqan edi.
«Cumhuriyetniñ esas uquqiy vesiqası qırımlılarğa fikir ve söz serbestligini kefil ete. Bugün bizde 800 ticariy olmağan teşkilât, 39 milliy-medeniy cemiyet, 230 kütleviy matbuat vastası qayd etilgen. Bu statistika bile insanlarnıñ yüksek vatandaşlıq faalligi ve demokratik serbestliginiñ inkişafını köstere», – dedi o.
2014 senesi aprel 11-de Qırım Devlet Şurasınıñ plenar toplaşuvında 8 bab ve 95 maddeden ibaret olğan «Qırım Cumhuriyetiniñ Anayasası» qabul etilgen edi. Qırımtatar Milliy Meclisi Anayasanı qabul etilemeycek bir vesiqa olaraq adlap tenqit etti.
