Uquq qoruyıcılarnıñ fikrine köre, Rusiye tarafından mart 2014 senesi işğal etilgen Qırımdan aqiqiy malümatnı elde etmege imkânsız olacaqtır.
Şu cümleden, bu kibi fikirni Kiyevde aprel 9 künü İnsan aqları boyunca Qırım alan eyyetiniñ reis muavini Оlga Skripnik bildirdi, haber ete Qırım.Aqiqat mühbiri.
«Mustaqil jurnalistlerniñ büyük bir qısmı Qırımnı terk etti, böylece biz akimiyetniñ noqtaiy nazarından farqlı olğan Qırım vaziyeti aqta aqiqiy malümatnı elde etip olamaycağımıznıñ telükesi bar. Em de soñki vaqıtları nice sebepsiz tintüv keçirildi. Yalıñız akimiyet tarafdarları olğan matbuat vastaları qalsa, Qırımdan doğru malümatnı elde etmek – murekkep bir mesele olur», – dey uquq qoruyıcı.
İnsan aqları boyunca Ukrain Helsing gruppasınıñ eksperti Sergey Zayetsniñ fikrine köre, Qırımda mustaqil matbuat vastaları ve cemiyetniñ şaraitlerinden sebep er kes özü-özüni tsenzurağa oğrata.
«Öz fikrini bildirmege istegen insan özüni tsenzurağa oğrata, çünki bundan soñ oña da qarşı cinaiy işniñ açılmasından qorqa. Bu manada, elbette, fikir bildirüv serbestligi saasında insan aqları halqara standartlarınıñ bozuluvı aqta aytmaga mümkün», – dey o.
Malüm olğanı kibi, 2015 senesi mart 13-te Qırım jurnalistleri Anna Andriyevskaya ve Natalya Kokorinanıñ ana-babaları yaşağan evlerde FSB tintüv keçirdi. Bunıñ sebebi Tsentr jurnalistskih rassledovaniy neşirinde çıqqan maqale boyunca cinaiy iş oldı.
Böylece, Qırımda yaşamağan Anna Andriyevskayağa qarşı FSB Rusiye Ceza kodeksiniñ 280.1-inci maddesi boyunca «Krım» batalyonınıñ göñüllileri aqqında maqalesi içün cinaiy iş açtı.
Natalya Kokorinanıñ ana-babasınıñ evinde tintüv keçirilgen soñ jurnalistni FSB idaresine alıp kettiler. Onı iş boyunca şaat olaraq altı saat sorğuğa çektiler. Soñra ise bilgiyasayarını alıp, azat ettiler.
