Link açıqlığı

Qırımda jurnalistlerge qarşı açılğan cinaiy işlerniñ taqiqat ketişatı belgisizdir, dey jurnalist Anna Andriyevskaya, oña qarşı Rusiye FSB cinaiy işni açtı.

Bunı o Kiyevde matbuat konferentsiyası devamında bildirdi, haber ete Qırım.Aqiqat mühbiri.

Andriyevskaya dey ki, şimdilik yarımadada uquqiy qaide kibi bir şey yoq.

«İşimniñ ilerideki inkişafı belgisizdir. Qırımda bir de bir uquqiy ceet çalışsa edi, nevbette böyle, ya böyle areketniñ olacağını aytmağa mümkün olur edi. İşniñ inkişafı bizler içün belgisizdir, mında daa qaç iştirakçi peyda ola bilecegini bilmeymiz. Esası, mezkür iş Rusiye akimiyetiniñ yalıñız şimdi yarımadada yaşağan degil de, Qırım tışına ketken Qırım jurnalistlerine nisbeten basqı shemasını köstere. Olarda (jurnalistlerde – muar.) Qırım qaydı bar, yani Rusiye olarnı öz vatandaşı olaraq tanıy ve olarğa nisbeten Rusiye qanuniyetiniñ qaidelerini qullana bile», – dedi o.

Onıñ fikrine köre, yarımada tışına çıqqan jurnalistler bilе Qırım aqqında yazğanda, öz aqiqiy adlarını belgilep olamay, özleri ve tuvğanları içün telüke olmasın dep.

«Böyleliknen Qırımnıñ işğalci Rusiye ükümeti Qırım qaydı olğan er bir insannıñ üner faaliyetiniñ serbestligini tutıp ala», – dey Andriyevskaya.

O kene de bütün bu vaziyet boyunca Ukraina resmiy akimiyetiniñ muayyen fikri olmağanını qayd etti.

Malüm olğanı kibi, 2015 senesi mart 13-te Qırım jurnalistleri Anna Andriyevskaya ve Natalya Kokorinanıñ ana-babaları yaşağan evlerde FSB tintüv keçirdi. Bunıñ sebebi Tsentr jurnalistskih rassledovaniy neşirinde çıqqan maqale boyunca cinaiy iş oldı.

Böylece, Qırımda yaşamağan Anna Andriyevskayağa qarşı FSB Rusiye Ceza kodeksiniñ 280.1-inci maddesi boyunca «Krım» batalyonınıñ göñüllileri aqqında maqalesi içün cinaiy iş açtı.

Natalya Kokorinanıñ ana-babasınıñ evinde tintüv keçirilgen soñ jurnalistni FSB idaresine alıp kettiler. Onı iş boyunca şaat olaraq altı saat sorğuğa çektiler. Soñra ise bilgiyasayarını alıp, azat ettiler.

XS
SM
MD
LG