Link açıqlığı

Ukrain rejissöri Oleg Sentsov ile beraber Rusiyede Qırımdaki teraktlarnıñ azırlanmasında qabaatlanğan Qırım faali Aleksandr Kolçenko Avropa İnsan aqları mahkemesine oña Rusiye vatandaşlığı berilgeninden şikâyet etti. Bunı adliyecisi Svetlana Sidorkina bildirdi, dep haber ete «Vedomosti».

Adliyeciniñ aytqanına köre, Kolçenko adına 2014 senesi mayıs 26-da berilgen Rusiye pasportı qanunsız, çünki o apiste bulunğan edi. Vesiqanı babası aldı, amma buña Kolçenkonıñ razılığı yoq edi. Yanvar ayında Kolçenkonıñ Ukraina vatandaşlığını tanımaq muracaatı Aqmescit mahkemesi tarafından qabul etilmedi.

Kolçenkonıñ Strasbourg mahkemesine bergen şikâyetinde aytıla ki, Rusiye vatandaşı olıp, onıñ halqara uquq imayesine aqqı yoq oldı. O, Rusiyeniñ Qırım işğalinden soñ yarımadanıñ diger sakinlerine berilgen Rusiye vatandaşlığına itiraz bildire.

Ukrain ombudsmeniniñ ofisi Ukraina Migratsion hızmetiniñ Kölçenkonıñ Ukraina vatandaşlığını tasdıqlağan vesiqanı derc etti.

Qırım faali Aleksandr Kolçenko 2014 senesi mayıs 17-de Qırımda «Yedinaya Rossiya» ofisiniñ ateşke berilmesinde şeklenip yaqalanğan edi. O künden berli onı Moskvadaki «Lefortovo» SİZOsında tutalar.

Aprel 9-da Lefortovo mahkemesi Aleksandr Kolçenkonıñ apis müddetini arttırmaq qararını baqacaq.

XS
SM
MD
LG