Avropa İnsan aqları mahkemesi Qırımtatar Milliy Meclisi reisiniñ mesleatçısı İsmet Yükselniñ Rusiyege qarşı şikâyetini qabul etti.
Bunı 2015 senesi mart 18 künü sanı ile Strasbourgtan (Frenkistan) kelgen mektüpte İsmet Yükselniñ Rusiye ve Avropada adliyecisi İllarion Vasilyevge bildirdiler, dep haber ete QHA.
Adliyeciniñ bildirgenine köre, belli bir müddetten soñ muracaatnı ya red etecekler, ya da Rusiye ükümetine şikâyet mündericesi aqqında haber etecekler.
Yükselniñ adliyecisi Avropa mahkemesine Rusiye tarafından İnsan aqları ve serbestligini qoruv konventsiyasınıñ bir sıra maddeleriniñ bozulmasından şikâyet etti: ariza bergenniñ şahsiy yaşayışına kirişüv, areket serbestligini sıñırlav, qanunsız sürgünlik, ayırım, adaletsiz mahkeme, mal-mülk aqlarınıñ bozulması. Bu Rusiyeniñ Yükselge Qırımğa kiriş yasağı ile bağlı.
İsmet Yüksel Rusiyeniñ FSB qararına itiraz bildirmek içün mahkemede dava açqan edi. Şikâyet em Aqmescit, em de Moskvada berilgen edi. Aqmescitniñ Kiyev rayon mahkemesi şikâyetni baqmadı. Moskvanıñ Meşçanskiy rayon mahkemesi İsmet Yükselniñ işini yanvar 22-de baqtı. FSB vekilleri mahkemege kelmediler. Soñra FSB muracaatınen işni Moskva şeer mahkemesine berdiler.
Qırımtatar halqınıñ liderleri Mustafa Cemilev ve Refat Çubarovnıñ da yarımada işğalinden soñ Qırımğa kirişleri yasaq etildi.
