Kiyevde aprel 11-de köçip kelgenler içün daa bir «Qırımnı sevemiz!» aktsiyası keçirilecektir. Körüşüv teşkilâtçısı olğan «Qırım diasporası» cemaat teşkilâtı Qırım.Aqiqatqa bildirdi ki, körüşüv Yalta şeerine bağışlanacaq.
«Yalta sakinleri tarihnıñ belli olmağan tarafları, Yalta tabiatı – şeer etrafında olğan dağ ve ormanlar aqqında tarif etecekler. Sizler Yalta aqqında yañı şeyler ögrenirsiñiz ve «Ukrainanıñ yaz paytahtı» aqqında viktorinada iştira etersiñiz. Körüşüvde tabiat güzelligi, Yaltanıñ tarihiy ve medeniy yerleri, yalıñız Kiyevde yaşağan qırımlılarnen degil de, diger şeerlerde oturğan vatandaşlarnen de Skype vastasınen laf etmege imkânıñız olacaq», – dep bildireler teşkilâtçılar.
«Qırım diasporası» cemaat teşkilâtı Kiyevde «Qırımnı sevemiz!» körüşüvlerini teşkil etti. Olardan biri 2015 senesi fevral başında ötkerilgen edi.
Bunıñ kibi körüşüvler yıl devamında er ay keçirilip, Qırımnıñ şeerlerine bağışlanacaqtır. Aluşta, Ermeni Bazar, Bağçasaray ve Qarasuvbazarğa bağışlanğan körüşüvler endi olıp keçti. Körüşüvlerni tarihçılar ve Qırım işğalinden soñ qıtaiy Ukrainağa köçip kelgen şeerniñ sakinleri azırlaylar.
