Qırım akimiyeti 2014 senesi mart ayında Rusiye yarımadanı işğal etken soñ qabul etilgen Qırım Anayasasını tarqatuv aktsiyasını keçirmege qarar aldı.
Bunı Qırımnıñ Rusiye ükümetiniñ matbuat hızmeti bildire.
Anayasanı aprel 10-da tarqatmağa planlaştıralar.
«Qırım malümat poligrafiya imkânları institutınıñ göñülli studentleri tarqatacaq Anayasanıñ nushaları Qırımnıñ üç devlet tili – rusça, ukraince, qırımtatarca bastırıldı», – aytıla beyanatta.
Nazirler şurası bu aktsiyanıñ maqsadı olaraq «Cumhuriyetniñ esas Qanunı – Anayasanı bilüv derecesini arttıruv, em de Qırım Anayasası Künü munasebeti» dep adladı.
2014 senesi aprel 11-de Qırım Devlet Şurasınıñ plenar toplaşuvında 8 bab ve 95 maddeden ibaret olğan «Qırım Cumhuriyetiniñ Anayasası» qabul etilgen edi. Qırımtatar Milliy Meclisi Anayasanı qabul etilemeycek bir vesiqa olaraq adlap tenqid etti.
