Link açıqlığı

Aqyarnıñ bazı mikrorayonlarında aprelniñ başında çoq daireli çoq qatlı evlerde merkeziy qızdıruv eksildi. Aynı vaqıtta şeerniñ diger rayonlarında mesken evlerni qızdıralar. Bunı yerli sakinler Qırım.Aqiqatqa bildirdiler.

Ostrâkov caddesinde ömür arqadaşı ve kiçik balası ile yaşağan 28 yaşında Marina onıñ dairesi aman-aman qızdırılmağanını bildire.

«Bizler qalın kiyinmege ve daireni siyrekçe avalandırmağa başladıq. Elektrik qızdırğıçnı qıdıramız», – dep ayta qadın.

Kamışovaya buhta mikrorayonında yaşağan 57 yaşında Georgiy de qızdıruvnıñ keyfiyetinden şikâyetçi.

«Yaramay qızdıralar: batareyalar biraz cıllı. Urba gece bile batareyada qurumadı. Amma qızdıruv parasını tolusınen alacaqlarını tüşünem», – dedi o.

«Lötçiki» mikrorayonında yaşağan 50 yaşında Vladimir ise onıñ dairesi yahşı qızdırılğanını farq etti.

Yerli sakinlerniñ qayd etkenine köre, mart ve aprelniñ başı Aqyarda biraz suvuq oldı. Meselâ, aprel 8-de kündüz Aqyarda ava arareti 5-6 dereceni teşkil etti. Bu avada şeerniñ kommunal hızmetleri evlerni qış cedveline köre qızdırmaq kerekler.

Aqyarnıñ Rusiye akimiyeti şeerde qızdıruv mevsiminiñ yekünlenmesi aqqında bir de bir resmiy malümat bermedi.

XS
SM
MD
LG