Ukraina Devlet sıñır hızmeti yarımadanıñ memuriy sıñırında Rusiye sıñırcıları qıtaiy Ukrainadan kelgen maşinalarnı kirsetmey kibi haberni red etti. Qırımlılarnıñ bildirgenine köre, çarşenbe künü, aprel 8-de, Qırımğa ne yük, ne de yolcu naqliyat kirsetile kibi haber peyda oldı, lâkin bunıñnen bağlı resmiy malümat Qırımda olmadı.
Ukrain sıñır hızmetiniñ matbuat kâtibi Oleg Slobodân Qırım.Aqiqatqa bildirdi ki, malümat tasdıqlanmadı.
«İşğal etilgen Qırım ile memuriy sıñırda tınç vaziyet üküm sürmekte. Bir qaç maşina nevbette tura. Rusiye sıñırcıları yarımadağa kirişni qapattılar kibi malümat tasdıqlanmay», – dep ayttı Oleg Slobodân.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
