Mahkemeci olmağanlardan şekillendirilgen eyyet qırımtatarlarnıñ milliy lideri Mustafa Cemilevniñ oğlu Hayser Cemilevniñ işini salı künü, aprel 14-te, baqacaq. Çarşenbe künü, aprel 8-de, adliyeci Nikolay Polozov bildirdi ki, Krasnodar ülkesiniñ mahkemesi Hayser Cemilevniñ işi boyunca mahkemeciler olmağanlarnıñ eyyetini şekillendirdi.
«16 mahkemeci olmağan şahıs saylandı, olardan 12 esas ve dörtü qoşma olaraq. Birinci toplaşuv aprel 14-ke belgilendi», – dep yazdı Nikolay Polozov Twitterde.
Malüm olğanı kibi, Krasnodar ülkesiniñ mahkemesi aprel 8 künü qırımtatarlarnıñ milliy yetekçisi Mustafa Cemilevniñ oğlu Hayser Cemilevniñ işi boyunca itiraz arizasını qabul etmedi.
Adliyeci Nikolay Polozovnıñ bildirgenine köre, Onıñ malümatına köre, itiraz arizası lâğu etilgeninden soñ, Hayser Cemilevniñ işi boyunca mahkemeci olmağanlarnıñ eyyeti teşkil etilmege başlandı.
Hayser Cemilevni 2013 senesi mayıs 27-de onıñ Bağçasaraydaki evinde yaqaladılar. Anda 44 yaşında Fevzi Edemov öldürilgen edi.
Militsiya Cinaiy kodeksniñ 115-inci maddesiniñ 1-inci qısmı boyunca (planlaştırılğan öldürüv) cinaiy iş açtı. Aqmescitniñ Kiyev rayon mahkemesi Hayser Cemilevni apiske aldı.
Qırım işğalinden soñ taqiqat organları bu işni ğayrıdan taqiq etmege qarar berdiler. Kiyevniñ Apellâtsion mahkemesi ise Hayser diqqatsızlıqtan cinayet yaptı qararına kelip, onı azat etmege qarar aldı. İnsan aqları Avropa mahkemesi de Hayser Cemilevniñ azat etilmesi aqqında qararnı qabul etti. Lâkin Rusiye onı yerine ketirmey. Hayserni Qırım SİZOsından Krasnodar ülkesine alıp kettiler.
