Link açıqlığı

Ukraina mekteplerinde qırımtatar sürgünliginiñ qurbanları hatırasına ders keçirilecek


Müellif: Rustem Eminov

Ukraina mekteplerinde mayıs 18-de qırımtatar halqınıñ sürgünligi qurbanlarınıñ hatırasına bağışlanğan yekâne ders keçirilecektir. Bunı «KrımSOS» cemaat teşebbüsiniñ koordinatorı Tamila Taşeva Qırım.Aqiqatqa bildirdi.

Onıñ aytqanına köre, bu yönelişte teşkiliy işni «Almenda» vatandaş tasiliniñ merkezi «KrımSOS» cemaat teşkilâtınıñ yardımı ile baqa.

«Sürgünlik kününe bağışlanğan ders leyhalarınıñ yarışı aqqında laf kete. Mayıs 18-de ukrain mekteplerinde böyle ders keçecek. Lâkin başta onı, tabiiy ki, azırlamaq kerek. Şunıñ içün şimdi ocalar leyhalarını azırlaylar. Arizalar qabul etile. Mayıs 18-ge qadar yetiştirirmiz, dep tüşünem», – dep ayttı Taşeva.

«KrımSOS» cemaat teşebbüsiniñ koordinatorı qayd etti ki, Ukraina tasil ve ilim nazirligi işbu leyhağa qoltuttı. Qırımtatar halqı sürgünliginiñ qurbanları hatırasına ders ukrain mekteplerinde ilk sefer keçirilecektir.

Bu aqqında tafsilâtlı malümatnı Tamila Taşevanıñ intervyüsında ögrene bilesiñiz. Maqale eñ yaqın vaqıtta Qırım.Aqiqatta bastırılacaqtır.

Mayıs 18 künü – Qırımtatar halqınıñ Qırımdan sürgün etilüv künüdir. 1944 senesi o künü qırımtatarlarnıñ birinci treni Orta Asiyağa yollanğan edi.

Qırım işğalinden evel Aqmescitte yıl-yıldan Bütün Qırım matem mitingi keçirilgen edi.

XS
SM
MD
LG