Link açıqlığı

Saatnıñ esas haberi

Moskvada Qırımnıñ siyasiy mabusları içün ceza mahkemeleri keçirilecek


Rusiyede teraktlarnıñ azırlanmasında şeklengen ukrain rejissöri Oleg Sentsov ve Qırım faali Aleksandr Kolçenko içün ceza belgilemek içün aprel 8-9 künleri mahkeme keçirilecektir.

Bunı mabuslarnıñ qoltutuv gruppasında Qırım.Aqiqatqa bildirdiler.

Olarnıñ malümatına köre, çarşenbe künü, saat 15:00 Moskvanıñ Lefortovo rayon mahkemesinde Oleg Sentsovnıñ cezası baqılacaq. Cumaaqşamı künü saat 11:00 aynı mahkemede Aleksandr Kolçenkonıñ ceza meselesi baqılacaq.

«Şübesiz, taqiqatçılar Sentsov ve Kolçenkonıñ «Lefortovo» SİZOsında apiste bulunmasını isteycekler», – dep qayd eteler qoltutuv gruppasında.

Keçken afta Aleksandr Kolçenkonıñ tam qabaatı aydınlatıldı. Yaqın künleri adliyeciler aynısını Oleg Sentsov içün bekleyler. Adliyecilerniñ tahminlerine köre, iş malümatı eki ay devamında ögrenilecek, soñra ise mahkemege berilecektir.

Qırımda faşizmge qarşı küreşken içtimaiy faal Aleksandr Kolçenko 2014 senesi mayıs ayında Aqmescitte apiske alınğan edi. Onı Moskvadaki «Lefortovo» SİZOsına yolladılar. FSB taqiqatçıları onı ve Qırımnıñ daa üç sakinini, şu cümleden ukrain rejissöri Oleg Sentsov, tarihçı Aleksey Çirniy ve adliyeci Gennadiy Afanasyevni terroristik areketler, terakt azırlanması ve silânı qanunsız qullanuvda qabaatlaylar.

Ukrainada olarnı siyasiy mabus olaraq tanıp, azat etilmelerini talap eteler.

XS
SM
MD
LG