Çarşenbe künü, aprel 8-de, Gaspra qasabasında yañı blok post peyda oldı.
Bunı Yalta faali Sergey Psaröv bildire ve delil olaraq videonı aşkâr ete.
Onıñ malümatına köre, mında kelip-ketkenlerni diqqatnen tinteyler.
«Qasabanıñ şarqiy kirişinde blokpost tiklengen, kelip-keçtken maşinalar iç bir sebepsiz aşalayıcı tintüvge oğray. Elbette ki, bu er şey turisterniñ diqqatını celp eter. Evge hoş keldiñiz, arqadaşlar», – yazdı o.
Keçken afta yarımada boyunca blok-postlar tiklengen edi. Bunıñ ile beraber maşina ve evlerde tintüvler keçirile edi.
Rusiye İçki işler nazirligi bildire ki, aprel 2-de Rusiye İçki işler nazirligininh içki ordularınıñ «Zaslon-2015» talimleri başladı. Talimler aprel 10-ğa qadar devam etecek.