Şimdilik Amsterdamda qalğan skit altınnıñ kollektsiyası oğrunda Ukraina küreşi «Rusiyeniñ iylesi ile müşkülleştirile», – dedi salı künü, aprel 7-de, brifingde Ukraina medeniyet naziri Vyaçeslav Kirilenko, haber ete Ukrinform.
«Skit altınına kelgende, Amsterdamda başlanğan mahkeme ketişatı, halqara qaideleriniñ esas ümdeleri Ukraina tarafında olğanına baqmadan, qolay olmaz. Ketişat mürekkep, çünki Rusiye tarafı bütün resurslarını işletti. Eminim, qaparcılıq resursları da işletilgen, şunıñ içün ketişat uzana. Rusiye tarafı yañı şartlarnı ögrenmege talap ete ve ilâhre», – dedi Kirilenko.
Onıñ sözlerine köre, Ukraina, memleketke Devlet müzey fondu eksponatlarını qaytarmaq içün yuridik ceetten bütün zaruriy areketlerni yapa.
Ukraina menfaatını çetel mahkemelerinde temsil etken Adliye nazirligi bu işni nezaret ete, Ukraina menfaatını Amsterdamda «işançlı temsilci» qoruy.
«Ukraina altınnıñ işğal etilgen territoriyağa degil de, Ukraina nezaretinde olğan territoriyağa qaytarılmasından başqa çare körmey», –dedi Kirilenko.
«Qırım: Qara deñiz altın ve sırları» sergisi Amsterdamda Allard Pirson müzeyinde 2014 senesi fevral-avgust ayları keçirile edi. Qırım işğalinden soq ukrain akimiyeti artefaktlar Ukraina devletine ait olğanını bildirdi.
Niderlandı müzeyi, memleketler arasında bir añlaşma omlağanına qadar, altınnı ne Ukraina, ne Qırımğa bermemege qarar aldı.
