Qırım jurnalisti Anna Şaydurovanıñ Rusiye Federal havfsızlıq hızmetiniñ idaresinde sorğusını aprel 7-den başqa künge keçirdiler.
Bunı Qırım.Aqiqatqa Şaydurovanıñ özü bildirdi.
Onıñ sözlerine köre, sorğunı aprel 8 künü sabasına keçirdiler.
«Sorğumnı saba saat 9-ğa avuştırdılar. Sebebini añlatmadılar, tek körüşüvni başqa künge keçirmege rica ettiler», – ded jurnalist.
Aqmescitte aprel 7-de saba Qırım jurnalisti Anna Şaydurovanı telefon vastasınen Federal havfsızlıq hızmetiniñ idaresine (FSB) çağırdılar. Şaydurovanıñ aytqanına köre, sorğu sebebi onıñ eski işi ile bağlı ola bile. Çünki o da Tsentr jurnalistskih rassledovaniy agentliginiñ hadimi edi.
Malüm olğanı kibi, 2015 senesi mart 13-te Qırım jurnalistleri Anna Andriyevskaya ve Natalya Kokorinanıñ ana-babaları yaşağan evlerde FSB tintüv keçirdi. Bunıñ sebebi Tsentr jurnalistskih rassledovaniy neşirinde çıqqan maqale boyunca cinaiy iş oldı.
Böylece, Qırımda yaşamağan Anna Andriyevskayağa qarşı FSB Rusiye Ceza kodeksiniñ 280.1-inci maddesi boyunca «Krım» batalyonınıñ göñüllileri aqqında maqalesi içün cinaiy iş açtı.
Natalya Kokorinanıñ ana-babasınıñ evinde tintüv keçirilgen soñ jurnalistni FSB idaresine alıp kettiler. Onı iş boyunca şaat olaraq altı saat sorğuğa çektiler. Soñra ise bilgiyasayarını alıp, azat ettiler.
