Salı künü, Rusiye muhalifetçisi Boris Nemtsov ölüminiñ qırqıncı künü, Moskvada adamlar Bolşoy Moskvoretskiy köprüne çeçeklerni alıp keteler. Nemtsov bu yerde fevral 27-de öldürilgen edi.
Radio Svoboda vaqia yerini köstere. Siyasetçiniñ ortaqları saat 11:00 başlanacaq «Sükünet OLMAĞAN daqqası» aktsiyasına toplaşalar.
Teşkilâtçılar Boris Nemtsovğa lâqayt olmağanlarnı onı añmağa çağıralar. «Cayav ketseñiz – bir daqqa turıñız, maşina ile ketseñiz – ses beriñiz». «Bizler öldürüv yerine çeçek ketiremiz – olarnı alalar. Bizler Boris Nemtsovnıñ hatırasına kontsert keçiremiz – onı yasaq eteler. Bizlerge unutmaq eñ yahşısı olğanını aytacaq olalar. Lâkin bizler – hatırlaymız. Bizni eşiteler», – dep aytalar Nemtsovnıñ ortaqları.
Aprel 7-de saat 16:00 «Dojd» telekanalında «Nemtsov most» telemarafonı başlaycaqtır.
