Yarımadada aprel 1-den itibaren yayınını toqtatqan ATR birinci qırımtatar telekanalınıñ saibi Lenur İslâmov dey ki, Rusiyeniñ yarımadada tamır halqı ve onıñ milliy kütleviy haber vastalarına qarşı yapqan areketleri rus ealisiniñ bir qısmını raatsızlay.
Bunı o, «Otkrıtaya Rossiya» neşirine bergen intervyüsında ayttı.
«Men mediaholdingimizde çalışqan ruslarnı daa çoq acıyım. Olar da birlik ğayemiznen yaşaylar. Olar daa çoq zarar köreler: olar añlap olamaylar, çünki olar içün ana olacaq Rusiye asılında qara qalpli ögey ana olıp çıqtı. O, olarnı qabul etmey, çünki olar qırımtatarlarnen beraber keteler», – dedi İslâmov.
O, ATR telekanalınıñ qapatılması – qırımtatar ealisine nisbeten ayırımnıñ daa bir adımı, böyle etip tamır halqı kütleviy şekilde köçip kete bilecegine emin.
«Bu Yekaterina zamanında olğan göñülli sürgünliktir. Hatırlağan olsañız, o, böyle yazğan edi: «Qarşı çıqmamaq, ve atta qoltutmaq», – şimdi de bunı körecekmiz. Esnas başladı artıq. Onı toqtatmasaq, halq Qırımnı terk ete bile, ve Rusiye içün bu kederli bir şeydir. Çünki bu artıq genotsidke yaqın olmasa da, amma buña yaqındır», – dep ayttı ATR qırımtatar telekanalınıñ saibi.
Aprel 1-den itibaren ATR yayınını toqtattı. Mart ayınıñ soñuna qadar ATR media-holdingi Rusiye qanunlarına köre kütleviy haber vastası olaraq öyle de qayd olamadı.
Şirket Roskomnadzorğa vesiqalarını bir qaç kere bergen edi, lâkin olarnı farqlı sebeplerden keri qaytara ediler. Aprel 1-ge keçer gecesi ATR telekanalı, Lâle bala telekanalı işini toqtatmağa mecbur oldılar. «Meydan» ve «Lider» radioları da diñleyicilerinen sağlıqlaştılar. Reberlik telekanalnı qayd etmege tırışacağını bildirdi.
ATR qapatılğan soñ cumhuriyetniñ akimiyeti cemaat qırımtatar telekanalını açmağa teklif etti. Olarnıñ fikirince, qırımtatarlar kerçek malümatnı almaq aqqını qullanacaqlar.
