Qırımnıñ Rusiye ükümetiniñ baş nazir muavini, aynı vaqıtta malümat siyaseti naziri Dmitriy Polonskiy ATR birinci qırımtatar telekanalınıñ yayın toqtatılması uquqiy meselelernen bağlı olğanına emin. Onıñ fikirince, telekanal etrafında milliy facianı köterecek ediler.
Bunı Polonskiy lenta.ru neşirine bergen intervyüsında ayttı.
«ATR vaziyeti bir de bir ciddiy açuv ya da eyecan doğurmadı. Kanal reberligi Aqmescitte vedalaşuv mitingini ilân etkende bile. Aktsiyağa yüzden ziyade adam kelmedi. Olarnıñ ekseriyeti de telekanalnıñ hadimleri edi. Uquqiy davadan milliy facianı yapmaq ıntıluvı kerçekleşmedi», – dep ayttı baş nazirniñ muavini.
O, ATR hadimleriniñ çoqusı akimiyetniñ yardımı ile meydanğa ketirilgen cemaat qırımtatar teleradiokompaniyasına çalışmağa keçecegine emin.
Aprel 1-den itibaren ATR yayınını toqtattı. Mart ayınıñ soñuna qadar ATR media-holdingi Rusiye qanunlarına köre kütleviy haber vastası olaraq öyle de qayd olamadı.
Şirket Roskomnadzorğa vesiqalarını bir qaç kere bergen edi, lâkin olarnı farqlı sebeplerden keri qaytara ediler. Aprel 1-ge keçer gecesi ATR telekanalı, Lâle bala telekanalı işini toqtatmağa mecbur oldılar. «Meydan» ve «Lider» radioları da diñleyicilerinen sağlıqlaştılar. Reberlik telekanalnı qayd etmege tırışacağını bildirdi.
ATR qapatılğan soñ cumhuriyetniñ akimiyeti cemaat qırımtatar telekanalını açmağa teklif etti. Olarnıñ fikirince, qırımtatarlar kerçek malümatnı almaq aqqını qullanacaqlar.
