Link açıqlığı

«Fevral 26 işi» boyunca eki ay apiste bulunğan qırımlını azat ettiler


Qırımda Qırım parlamenti binasınıñ ögünde fevral 26 künü olıp keçken kütleviy çatışmalar işi boyunca yaqalanğan Eskender Kantemirov azatlıqqa çıqtı. Bunı bazarertesi künü, aprel 6-da, aqşam «15 minut» saytı bildire.

Malüm olğanı kibi, Eskender Kantemirov 2015 senesi fevral 7-de yaqalanğan edi. Bundan evel onıñ evinde tintüv olıp keçken edi. Fevral 8-de Kantemirovnı mahkeme qararı ile apiske aldılar. Onı Rusiye Ceza kodeksiniñ 212-nci maddesiniñ 2-nci qısmı belgilegen (kütleviy çatışmalarda iştirak etüv) cinayette qabaatlaylar. Taqiqatnıñ malümatına köre, «o, 2014 senesi fevral 26-da Aqmescitteki kütleviy çatışmalarda bir sıra grajdanğa beden zarar ketirdi».

Aprel 6-da onıñ apis cezasınıñ müddeti yekünlendi.

Ceza müddetini arttırmadılar.

Yanvar 29-da Qırım Cumhuriyeti boyunca Rusiye Federatsiyasınıñ Taqiqat komitetiniñ Baş taqiqat idaresiniñ taqiqat organları Ahtem Çiygoznı yaqalağan ediler. Aynı o aqşam Aqmescitniñ Kiyev rayon mahkemesi onı fevral 19-ğa qadar apiske aldı. Qırım prokurorı Natalya Poklonskaya bildirdi ki, onı ciddiy cinayette qabaatlaylar, ceza olaraq ise 10 yıllıq apis cezası ola bile. Qırım Cumhuriyetiniñ Apellâtsion mahkemesi Çiygoznıñ apiske alınması aqqında qararnı deñiştirmedi.

Mart 13-te Aqmescitniñ Kiyev rayon mahkemesi Qırım parlamenti binasınıñ ögünde fevral 26 künü olıp keçken kütleviy çatışmalar işi boyunca 30 yaşında Eskender Emirvaliyevni yaqaladı. O, aprel 18-ge qadar apiste bulunacaq.

XS
SM
MD
LG