Qırım akimiyeti Rusiye ükümetinden qırımtatarlarnıñ reabilitatsiyası aqqında vesiqalarnı aluv meseleleri boyunca işçi gruppasını meydanğa ketirmege rica ete. Qırım ükümetiniñ «ruporı» olğan Krıminform saytınıñ malümatına köre, Qırım yolbaşçısı Sergey Aksönov Rusiye ükümetiniñ baş nazir muavini Dmitriy Kozak ve Rusiye Tış işler naziri Sergey Lavrov adına bunıñnen bağlı mektüplerni azırlamağa avale etti.
«Böyle bir qararnı cumhuriyet yolbaşçısı «Namus» qırımtatar halqınıñ aqsaqallar şurasınıñ vekilleri ile körüşüvinden soñ qabul etti», – aytıla beyanatta.
Matbuat hızmeti qayd ete ki, körüşüvde reabilitatsiya aqqında vesiqalarnı aluv problemleri baqıldı. Böylece, Özbekistan Cumhuriyetinden berilgen vesiqalarnıñ berilmesi sozula.
«Qırımdan Özbekistanğa qırımtatar halqınıñ temsilcilerimiznen ve memurlarnen gruppanı yollamaq kerek», – dedi Aksönov.
Berilgen malümatqa köre, körüşüvde Qırım nazirler şurasınıñ reis muavini Ruslan Balbek, Qırım Devlet şurasınıñ reis muavini Remzi İlyasov, «Namus» qırımtatar halqınıñ aqsaqallar şurasınıñ reisi Dilşod İlyasov, «Namus» qırımtatar halqınıñ aqsaqallar şurasınıñ idare reisi Temur Çelebiyev, em de qırımlı Refat Göcenov ve Ruslan Eminov iştirak ettiler.
