Qırımtatar Milliy Meclisiniñ reisi Refat Çubarov Anayasa komissiyasınıñ azalarını qırımtatar halqınıñ kelecegini belgilemek aqqlarına büyük diqqat ayırmağa çağırdı. Bunı Refat Çubarov komissiyanıñ birinci toplaşuvını izaatlap, Facebook saifesinde bildirdi.
«Maña söz bermezden evel, Ukraina prezidenti Anayasa komissiyasınıñ azalarına Qırımnıñ siyasiy-uquqiy statusını qırımtatar halqınıñ aq-uquqları ile beraber al etmek kerekligini ayttı. Men Anayasa komissiyası azalarınıñ diqqatını Ukraina Anayasasında «Qırım Muhtar Cumhuriyeti» maddesine celp ettim, şu cümleden Qırımnıñ statusı qırımtatar halqınıñ kelecegini belgilemek aqqlarına köre belgilenmeli, dep qayd ettim», – dep yazdı Refat Çubarov.
Onıñ qayd etkenine köre, komissiya erkânına yalıñız Ukrainanıñ anayasa aqqı ve siyaset mütehassısları degil, halqara teşkilâtlarnıñ vekilleri de celp etildi.
Bundan evel Ukraina prezidenti Qırımtatar Milliy Meclisiniñ reisi Refat Çubarovnı Anayasa komissiyasınıñ erkânına kirsetken edi.
Ukraina prezidenti Petro Poroşenko Anayasa komissiyasınıñ toplaşuvında onıñ iştirakçilerini qırımtatar halqınıñ aq-uquqlarını qorumağa çağırdı.
