Link açıqlığı

Saatnıñ esas haberi

Qırım musulmanları Diniy idaresinde qırımtatar tili kursları keçirilmekte


Qırımda qırımtatar tilini ögrengen eki sınıfnıñ tantanalı mezuniyet tedbiri olıp keçti. Qırım musulmanları Diniy idaresiniñ matbuat hızmeti bildire ki, kurslar altı afta sürdi, derslerni Qırım müendislik pedagogika universitetiniñ ocası Milâra Settarova alıp bardı.

İmtianlarnıñ neticelerine köre, qırımtatar tili kurslarını keçüv diplomını 24 adam aldı, daa eki sınıf ögrenmege devam ete.

«Leyha «Qardaşlıq» cemaat teşkilâtı ve Qırım musulmanları Diniy idaresi tarafından ömürge keçirile. Bunıñ kibi kurslarnıñ maqsadı qırımtatarca qonuşmağa örgetmektir. Ders, meşğuliyetler, dialog, mustaqil iş ve oca ile mesleatlar sayesinde buña irişeler. Kurslar qırımtatar tilini ögrenmege istegen er kes içün açıqtır» – dep bildirdiler Qırım musulmanlar dİniy idaresiniñ matbuat hızmetinde.

«Qardaşlıq» cemaat teşkilâtınıñ reisi Asan Emir-Saleniñ bildirgenine köre, teşkilât bundan evel de bunıñ kibi kurslarnı teşkil etken edi.

«Soñki yılları, Qırım musulmanları dini idaresi ile işbirlik tutmağa başlağan soñ, vaziyet eyileşti: bizler bir qaç sınıfnı topladıq, olar zemaneviy tehnika ile donatılğan büyük salonda aynı vaqıtta ders çalışalar», – dep ayttı Asan Emir-Sale.

Qırım musulmanları diniy idaresiniñ matbuat hızmeti bildirdi ki, QMDİ bütün medreselerinde dersler qırımtatarca keçirile, kitap ve derslikler qırımtatarca bastırıla. Eñ yaqın vaqıtta musulmanlarnıñ muqaddes kitabı Quran-ı Kerimniñ qırımtatarcası bastırılacaqtır.

XS
SM
MD
LG