Ukraina prezidenti Petro Poroşenko Anayasa komissiyasınıñ toplaşuvında onıñ iştirakçilerini qırımtatar halqınıñ aq-uquqlarını qorumağa çağırdı. Bunı Devlet yolbaşçısınıñ matbuat hızmeti bildire.
«Prezident vatandaşlarnıñ aq-uquqları ve serbestligini anayasağa köre temin etüvniñ eyiliştirmesi aqqında aytıp, Anayasa komissiyasına qırımtatar halqınıñ aqlarını Ukrainanıñ tamır halqınıñ olaraq qorumağa, onıñ etnik, medeniyet, til ve din hususiyetlerini saqlap qalmaq ve inkişaf ettirmege teklif etti», – dep aytıla matbuat hızmetiniñ beyanatında.
Bundan evel Ukraina prezidenti Qırımtatar Milliy Meclisiniñ reisi Refat Çubarovnı Anayasa komissiyasınıñ erkânına kirsetken edi.
Ukraina prezidenti Petro Poroşenko ATR qırımtatar telekanalınıñ yayınlavını bütün Ukrainada tiklemege avale etti. Devlet yolbaşçısınıñ qayd etkenine köre, bu Ukraina akimiyeti içün şeref meselesidir. Poroşenko bildirdi ki, Ukraina ATR telekanalını Strasburgnıñ İnsan aqlarını qorçalav halqara mahkemesinde qorumağa azır.
