Kiyevde aprel 6-da Rusiye Federatsiyasınıñ Ukraina elçihanesi yanında Rusiyede teraktlarnıñ azırlanmasında qabaatlanıp mahkeme etilgen Qırım faali Aleksandr Kolçenko ile birdemlik aktsiyası keçirildi. Tedbirge bir qaç on kişi qoşuldı, dep haber ete Qırım.Aqiqat.
Aktsiyanıñ iştirakçileri «Putin yoq olsun, Kolçenko evge qaytsın!», «Saşa Kolçenkoğa azatlıq» kibi şiarlarnı seslendirip, qollarında «Free Kolçenko», «Birdemligimiz apishaneleriñizden quvetlidir» levhalarını tuttılar.
Aktsiyada faaller Kolçenkoğa adliyeciler hızmetlerini ödemek içün para topladılar.
«Belli olğanı kibi, mahkeme Rostovda olacaq, bayağı para kerek ve bizler sermiyanı toplaymız», – dep ayttı Qırımnıñ siyasiy mabusları ile birdemlik komitetiniñ iştirakçisi Aleksandra Romantsova.
Onıñ qayd etkenine köre, Kiyevdeki aktsiya – halqara kampaniya çerçivesinde keçirilgen aktsiyalardan biri, bunıñ kibi tedbirler Frenkistan ve diger memleketlerde olıp keçken edi.
Qırımda faşizmge qarşı küreşken içtimaiy faal Aleksandr Kolçenko 2014 senesi mayıs ayında Aqmescitte apiske alınğan edi. Onı Moskvadaki «Lefortovo» SİZOsına yolladılar. FSB taqiqatçıları onı, ve Qırımnıñ daa üç sakinini, şu cümleden ukrain rejissöri Oleg Sentsov, tarihçı Aleksey Çirniy ve adliyeci Gennadiy Afanasyevni terroristik areketler, terakt azırlanması ve silâ ile qanunsız qullanuvda qabaatlaylar.
Moskvanıñ Lefortovo rayon mahkemesi 2014 senesi dekabr 25-te qırımlınıñ apis cezasını 2015 senesi aprel 16-na qadar arttırdı. Kolçenko özüni Ukraina vatandaşı olaraq tanıtsa da, taqiqat onıñ Rusiye vatandaşlığı aqqında aytmağa devam ete.
