Link açıqlığı

Ukraina Tış İşler Nazirliginiñ içtimaiy ağlardaki resmiy saifeleri yarımadada Roskomnadzor qararından yayınlavı toqtalğan ATR qırımtatar telekanalınıñ belgisi altında çalışa, haber ete Qırım.Aqiqat.

Şu cümleden, qırımtatar telekanalınıñ logosını Ukraina Tış İşler Nazirliginiñ twitter ve Facebook saifesinde körmek mümkün.

Evel Ukraina Prezidenti Petro Poroşenko bütün Ukrainada ATR qırımtatar telekanalınıñ yayınlavını tiklemege avale etti. Devlet başı qayd etkeni kibi, yaqın zamanda Ukrainada, şu cümleden Qırımda, ATR yayınlavını tiklemek Ukraina akimiyeti içün şeref ola. Bundan ğayrı, Poroşenko Ukraina ATR telekanalını Strasbourgtaki İnsan aqları halqara mahkemesinde qorçalaycağını ayttı.

Mart ayınıñ soñuna qadar ATR media-holdingi Rusiye qanunlarına köre kütleviy haber vastası olaraq öyle de qayd olamadı. Şirket Roskomnadzorğa vesiqalarını bir qaç kere bergen edi, lâkin olarnı farqlı sebeplerden keri qaytara ediler. Aprel 1-ge keçer gecesi ATR telekanalı, Lâle bala telekanalı işini toqtatmağa mecbur oldılar. «Meydan» ve «Lider» radioları da diñleyicilerinen sağlıqlaştılar. Reberlik telekanalnı qayd etmege tırışacağını bildirdi.

XS
SM
MD
LG