Link açıqlığı

Türkiyede dünyanı qırımtatarlarnıñ Vatanını işğalden azat etmege çağırdılar


Türkiye qırımtatar teşkilâtlarınıñ platforma toplaşuvı, aprel 4 künü

Türkiye qırımtatar teşkilâtlarınıñ platforma toplaşuvınıñ iştirakçileri bütün medeniy cemiyetke «Qırımnı – qırımtatarlarnıñ Vatanını Rusiye işğalinden azat etmek ve Ukraina topraq bütünligini ğayrıdan tiklemege» talabı ile muracaatta bulundılar.

Bu aqta aprel 4-5 künleri toplaşuvda qabul etilgen platforma beyannamesinde aytıla, haber ete Qırımtatar Milliy Meclisiniñ matbuat hızmeti.

«Türkiye qırımtatar teşkilâtlarınıñ platforması şunı qayd ete ki, serbest cemiyette demokratik yolu ile saylanılğan qırımtatar halqınıñ temsiliy organları yarımadanıñ qanunsız işğalini tanımay ve uquq üstüniginiñ demokratik qaidelerine köre qanuniy aqlarınıñ tiklenmesi içün küreşmege devam ete»,– denile beyanatta.

Beyannamede toplaşuv iştirakçileri «vatandaş serbestliginiñ bozuluvı, Meclis yetekçileriniñ ve milliy areket azalarınıñ taqibi, mustaqil qırımtatar matbuat vastalarına basqı, insan aqlarınıñ bozuluvı ile bağlı akimiyetniñ ayırım areketlerini» takbih ettiler.

Beyanatta aytılğanı kibi, «işbu qanunsız areketler Halqara mahkemeler seviyesinde baqılmaq kerek».

Evel bildirilgeni kibi, qırımtatar teşkilâtlarınıñ platforma toplaşuvı vaqtında mayıs 17 künü Eskişehirde sürgünlik yıllığına bağışlanğan matem tedbirleriniñ ve iyül 31-avgust 2 künleri Türkiyede Qırımtatalarnıñ bütün dünya kongressiniñ keçirilmesi aqta qarar alındı.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

XS
SM
MD
LG