Cumaertesi künü, aprel 4-te, Türkiye Cumhuriyetiniñ paytahtında Türkiyedeki qırımtatar teşkilâtlarınıñ toplaşuvı başladı. Tedbirde platformağa kirgen 43 qırımtatar teşkilâtınıñ vekili iştirak etmekte, dep haber ete Qırım.Aqiqat.
Kün tertibinde qırımtatar halqınıñ sürgünligi yıllığına bağışlanğan matem tedbirlerniñ keçirilmesi ve Bütündünya qırımtatar kongressiniñ ötkerilmesi bar.
Tedbirge qırımtatar halqınıñ milliy lideri Mustafa Cemilev, Qırımtatar Milliy Meclis reisi Refat Çubarov, onıñ muavini Aslan Ömer Qırımlı, Meclis reisiniñ mesleatçısı İsmet Yüksel, qırımtatar milliy areketiniñ faali Sinaver Kadırov keldiler.
Qırımtatar teşkilâtları platformasınıñ işi aprel 5-ke qadar devam etecektir.
2015 senesi fevral ayında Türkiyedeki 43 qırımtatar teşkilâtı ğayretini birleştirip, yekâne platforma çerçivesinde işbirlik tutmağa qarar aldılar.
Malüm olğanı kibi, qırımtatarlarnıñ liderleri diaspora vekilleri ile körüşmek içün Ankarağa yol aldılar.
