Qırımnıñ memuriy sıñırında, Çonğar kiriş noqtasınıñ yanında, politsiya maşinaları ve silâlı adamlar ile blokpost tiklenildi. Bunı «Krım Media» neşiri mühbiriniñ malümatına esaslanıp bildire.
«Qırım çıqışında, «Çonğar» kiriş noqtasından 1 km mesafede, blokpost peyda oldı. Yol politsiya maşinaları ile qısmen qapatıldı, mında «İçki işler nazirliginiñ politsiyası» işareti ile onğa yaqın uquq qoruyıcı buluna, olardan ekisinde silâ bar», – dep haber ete neşir.
Blokpostnıñ yanına kelgen naqliyat vatslarını toqtatıp teşkereler. Avtobus aydavcısınıñ aytqanına köre, tünevin mında yolcularnıñ vesiqalarını teşkergen ediler, cuma künü, aprel 3-te, yalıñız aydavcınıñ pasportını istediler.
«Bunıñ kibi areketlerniñ sebebi añlatılmadı. Qırım Cumhuriyetindeki Rusiye FSB sıñır idaresiniñ matbuat kâtibi Yekaterina Tarasova Krım Media agentligine bundan haberi olmağanını ayttı», – aytıla beyanatta.
Malüm olğanı kibi, aprel 2-de Kezlev, Canköy ve Aqmescitte qırımtatarlar toplu yaşağan yerlerde tintüvler keçirilgen edi.
Rusiye İçki işler nazirligi bildire ki, aprel 2-de Rusiye İçki işler nazirligininh içki ordularınıñ «Zaslon-2015» talimleri başladı. Talimler aprel 10-ğa qadar devam etecek.
