Ukraina Baş prokuraturası Qırımda ATR telekanalı ve mediaholdingge kirgen diger kütleviy haber vastalarınıñ qapatqan Qırım akimiyetiniñ jurnalistlerniñ faaliyetine keder etmesi ile bağlı cinaiy işlerniñ açılmasını ilân etti. Bunı Ukraina Baş prokuraturasınıñ resmiy saytı bildire.
Matbuat hızmetiniñ malümatına köre, Qırımda «Ukraina Anayasası kefil etken söz ve fikir serbestligi, fikir ve tüşüncelerniñ serbest bildirilmesi, mustaqil Qırım kütleviy haber vastalarınıñ yoq etilmesi sıq-sıq» qayd etile.
«2015 senesi aprel 1-de cumhuriyetniñ prokuraturası vatandaşlarnı ve mustaqil Qırım kütleviy haber vastalarını qorumaq içün mahkemeden aldın taqiqatlarnıñ yekâne cedveline Ukrainanıñ Ceza kodeksi 171-inci maddesiniñ 1-inci qısmında qayd etilgen jurnalistlerniñ faaliyetine keder etüv cinayeti aqqında malümatnı kirsetti», – aytıla beyanatta.
Bu malümatnı Ukraina Qanunıñ 12-nci maddesine köre «Ukrainanıñ vaqtınca işğal etilgen toplarlarında vatandaşlarnıñ aq-uquqları ve serbestligini ve uquq rejiminiñ temin etüvi aqqında» Ukraina Baş prokuraturasına yollandı.
Malüm olğanı kibi, aprel 1-den itibaren ATR işini toqtattı. Mart ayınıñ soñuna qadar telekanal Rusiye qanunlarına köre öyle de qayd olamadı.
Telekompaniya Roskomnadzorğa vesiqalarnı bir qaç kere bergen edi, lâkin olarnı farqlı sebeplerden keri qaytarğan ediler. ATR mediaholdingine kirgen Lâle qırımtatar bala telekanalı, «Meydan» ve «Lider» radioları da aynı vaziyetke oğradılar. «15 minut» internet neşiri ve QHA da Rusiyede qayd etip olamadılar.
