Ukraina prezidenti Petro Poroşenko buyruqnı imzalap, Qırımtatar Milliy Meclisiniñ reisi Refat Çubarovnı Qırımtatar halqınıñ temsilciler şurasınıñ yolbaşçısı vazifesine tayin etti.
Bunı devlet yolbaşçısınıñ matbuat hızmeti bildire.
Prezidentniñ buyruğı Qırımtatar halqınıñ temsilciler şurasınıñ nizamnamesine deñişmeler kirsetti. Böylece, Şura reisi Qırımtatar Milliy Meclisiniñ reisi ola. Prezident şura reisini tayin ete ve işten boşata, aytıla beyanatta.
«Şura reisi hadimler erkânını belgiley ve reberlik yapa. Şuranıñ reisi ve diger azaları aylıqsız çalışalar. Qırımtatar halqınıñ temsilciler şurası artıq işğal etilgen Qırımdaki Aqmescitte degil, Kiyevde olacaq», – dep qayd eteler Poroşenkonıñ matbuat hızmetinde.
Bundan evel Poroşenko Qırımtatar Milliy Meclisiniñ reisini Anayasa komissiyasınıñ terbine kirsetti.
Qırımtatar halqınıñ temsilciler şurası Ukraina prezidenti yanında mesleat organı ola. Onıñ esas vazifesi sürgün olunğan qırımtatar halqınıñ Ukrainağa avdet olması ile bağlı siyasiy-uquqiy, içtimaiy-iqtisadiy, medeniy ve diger meseleler boyunca talil, teklifler azırlaması ve tahmin etmesidir.
