Link açıqlığı

Saatnıñ esas haberi

Smedlâyev: Qırımda blok-postlarnıñ peyda oluvını terrorizmge qarşı talimlerniñ keçirilmesi ile añlatalar


Qırım boyunca silâlı insanlar şeer ve qasaba kirişlerinde blok-postlarnı tiklemege devam etip, bunı terrorizmge qarşı talimlerniñ keçirilmesi ile añlatalar.

Bunı Qırım.Aqiqatqa qırımtatar areket faali, Qurultaynıñ Merkeziy saylav komissiya reisi Zair Smedlâyev bildire.

«Farqlı malümatqa köre, bu er şey 10 kün devam etecek. Noqtadan noqtağa yürip, blok-postlarnı tikleycek, maşinalarnı, insanlarnı teşkerecekler. Olarnıñ arasına Ukrainada sıq olğanlar, qırımtatarlar kire», – dedi o.

Onıñ malümatına köre, aprel 2 künü Kezlev, Canköy ve Aqmescitte, qırımtatarlarnıñ toplu yaşağan yerlerde tintüvler keçirilgen edi.

Böyle areketler ealini qorquta. Yarımadada arbiy aktivlikni içtimaiy ağlarda da faal sürette muzakere eteler. Qullanıcılardan biri aytqanı kibi, saba arbiyler sığınaqlarnı qaza, yollarda arbiy maşinalar yüre, silâlı insanlar yol boyu ketkenlerni tintey.

Qırım.Aqiqat bildirgeni kibi, aprel 2-de saba Seyit Eli (Juravki) köyünde politsiya blok-postlarnı tiklep, qırımtatar timsalleri ile maşinalarnı teşkermege başladı.

XS
SM
MD
LG