Evel Qırımtatar Milliy Meclisi bulunğan Bağçasaraynıñ şeer ZAGS binasında «Bağçasaraynıñ inkişaf institutı» yañı teşkil etilgen belediye muhtar işhanesi işleycek, haber ete Bağçasaray memuriyetiniñ matbuat hızmeti.
Beyanatta aytılğanı kibi, yañı şirket - şeer mülkiyeti olıp, şeerniñ inkişaf ve zemaneviyleştirüvi meseleleri ile oğraşacaq ola, sport ve medeniy yarışlarnı azırlaycaq, yaşlarnıñ vatanperverlik ruhunı terbiyeleycek, haber ve maarif faaliyetini alıp baracaq ola.
«İnstitutnıñ esas vazifelerinden biri - Bağçasarayda yaşağan milliy medeniyetleriniñ inkişafına fırsat yaratmaqtır», – dedi Bağçasaray memuriyetiniñ başı Vladimir Verhovod.
Onıñ sözlerine köre, binanıñ 100 metr kare meydanlığında evellеri Qırımtatar Milliy Meclisi yerleşe edi.
Qırım Hocalıq mahkemesi kiracını binanı terk etmege mecbur etti. Aqyarnıñ Apellâtsion hocalıq mahkemesi işbu qararnı tasdiqladı, yaqınları Meclis binanı terk etti.
Bundan evel Qırımtatar Milliy Meclisini Aqmescit merkezinde «Qırım» Fondu» hayriye teşkilâtına ait olğan binadan quvıp çıqardılar.
2014 senesi noyabr 18 künü Aqmescitte mahkeme toplaşuvı keçti, mında fondnıñ başı Riza Şevkiyevge 350 biñ ruble, fonduna ise 4,5 million ruble miqdarında para cezasını belgilediler.
