Amerika Qoşma Ştatları yarımadada bir qaç qırımtatar matbuat vastasınıñ qapatılmasını takbih ete.
Bu aqta aprеl 2 künü aşkâr etilgen AQŞ Devlet departamentiniñ beyanatında aytıla.
Şu cümleden, AQŞ devlet departamenti ATR teleşirketi ve daa bir qaç Qırım matbuat vastasınıñ qapatılması «Qırımda söz serbestligini bozğan areketler ile bir sırada» turğanını tüşüne.
«Rusiye işğalci akimiyeti tarafından qırımtatar matbuat vastalarınıñ, şu cümleden ATR, Qırımnıñ qırımtatar ealisi içün çalışqan soñki mustaqil telekanalınıñ, QHA haber agentligi, «Avdet» gazetası, «Meydan» radoistantsiyasınıñ qapatılmasını takbih etemiz», –denile beyanatta.
Devlet departamentiniñ matbuat kâtibi Marіе Нarf aytqanı kibi, ATR ve diger matbuat vastalarınıñ qapatılması «işğalge qarşı çıqqan qırımtatarlarnı ve diger şahıslarnı sustırmaq içün yapılğan yıllıq kampaniya neticesidir». Spiker şunı da qayd etti, qırımtatarlar «ayırım, qorquzuv ve taqipke oğray.
Malüm olğanı kibi, aprel 1-den itibaren ATR işini toqtattı. Mart ayınıñ soñuna qadar telekanal Rusiye qanunlarına köre öyle de qayd olamadı.
Telekompaniya Roskomnadzorğa vesiqalarnı bir qaç kere bergen edi, lâkin olarnı farqlı sebeplerden keri qaytarğan ediler. ATR mediaholdingine kirgen Lâle qırımtatar bala telekanalı, «Meydan» ve «Lider» radioları da aynı vaziyetke oğradılar. «15 minut» internet neşiri ve QHA da Rusiyede qayd etip olamadılar.
Qırımtatar kütleviy haber vastaları arasında Rusiyede yalıñız «Golos Krıma» gazetası qayd oldı, gazeta rusça çıqa. Neşirniñ malümatına köre, gazetanıñ cemi olaraq 6 biñ nushası çıqacaq ve yañı adı olacaq – «Golos Krıma New»
