Türkiye Tış işler nazirligi qırımtatar matbuat vastalarınıñ, şu cümleden ATR telekanalınıñ qayd etüv redini takbih etti.
Bu aqta Türkiye nazirliginiñ beyanatına aytıla.
«Qasevet çeke ve vaziyetni takbih etemiz», – deyler mında.
Mında şunı deyler ki, çaluşv izniniñ berilmemesi «qardaşlarğa qarşı ayırım siyasetniñ» nümünesi ola.
«Öz aqlarını barışıq ve demokratik yolu ile qorçalağan qırımtatarlar içün söz serbestligini qullanuv aqlarına manialarnıñ peyda etilmesi qardaşlarımızğa qarşı ayırım siyasetniñ nümünesi ola», – denile beyanatta.
Malüm olğanı kibi, aprel 1-den itibaren ATR işini toqtattı. Mart ayınıñ soñuna qadar telekanal Rusiye qanunlarına köre öyle de qayd olamadı.
Telekompaniya Roskomnadzorğa vesiqalarnı bir qaç kere bergen edi, lâkin olarnı farqlı sebeplerden keri qaytarğan ediler. ATR mediaholdingine kirgen Lâle qırımtatar bala telekanalı, «Meydan» ve «Lider» radioları da aynı vaziyetke oğradılar. «15 minut» internet neşiri ve QHA da Rusiyede qayd etip olamadılar.
Qırımtatar kütleviy haber vastaları arasında Rusiyede yalıñız «Golos Krıma» gazetası qayd oldı, gazeta rusça çıqa. Neşirniñ malümatına köre, gazetanıñ cemi olaraq 6 biñ nushası çıqacaq ve yañı adı olacaq – «Golos Krıma New»
