Rusiyeni SWIFT halqara ödev sisetmasından söndürmek kerek, dedi cumaaqşamı kun, aprel 2-de, Radio Svobodağa qırımtatar halqınıñ yetekçisi Mustafa Cemilev. Böyleliknen o, Rusiyege qarşı Qırım işğalinden sebep olğan sanktsiyalarnı izaatladı.
Mustafa Cemilev iqtisadiy cezalaranı arttımaq kerek olğanını tüşüne.
«Menimce, SWIFT halqara ödev sistemasını da söndürmek kerek. Rejimge qol tutqanlar oñaytsızlıqnı is etip, çorlanmalı. Hırsızlağan paranı masraf etalmayıp, bundan raatsız olmalı», – dedi o.
Onıñ sözlerine köre, Rusiyege ayınıqlıq pek yavaş kelmektedir.
«İnsanlarnıñ çoqusı teşviqat tesiri altındadır, öyle körüne. Çünki Qırımğa kelgende, ya da rejimniñ diger areketleri aqta söz yürütilgende, ziyalılar bile çeşit laflar ayta. Rusiye akimiyeti bir şeyni acımağan teşviqat tesiri altında olğanı bellidir. Malüm ki, doğru malümatnı bergen yekâne ATR qırımtatar telekanalı bile qapaldı», – dedi Cemilev.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
