Rusiye Roskomnadzorı matbuat vastalarınıñ söz serbestligi boyunca OSCE temsilcisi Dunja Mijatovićke ATR telekanalından Rusiye matbuat vastası olaraq qayd etilüvine yollağan bütün arizalarını köstermege vade ete. Bunı Roskomnadzor cumaaqşamı, aprel 2 künü, öz Facebook saifesinde bildire.
Teşkilât matbuat vastalarınıñ söz serbestligi boyunca OSCE temsilcisi Dunja Mijatovićni kütleviy kommunikatsiya saasında al etüv, nezaret ve kontrol idaresine kelmege teklif etti.
«Media idare etüv saasında uquq magistri olıp, Dunja Mijatović hanım bu vesiqalarnı, Rusiye qanuniyetini bozmayıp, nasıl sürette qabul etmek kerek olğanımıznı bizge añlatır, degen ümüttemiz. Çünki qanunğa sayğı – esas ve universal içtimaiy deger, öylemi?», – denile beyanatta.
Evel matbuat vastalarınıñ söz serbestligi boyunca OSCE temsilcisi Dunja Mijatović Qırımda matbuat vastalarınıñ söz serbestliginiñ ve haber irişiminiñ daa da ziyade sıñırlanğanını aytqan edi.
Böyleliknen Dunja Mijatović ATR qırımtatar telekanalınıñ qapatılmasına seslendi.
Malüm olğanı kibi, aprel 1-den itibaren ATR işini toqtattı. Mart ayınıñ soñuna qadar telekanal Rusiye qanunlarına köre öyle de qayd olamadı.
Telekompaniya Roskomnadzorğa vesiqalarnı bir qaç kere bergen edi, lâkin olarnı farqlı sebeplerden keri qaytarğan ediler. ATR mediaholdingine kirgen Lâle qırımtatar bala telekanalı, «Meydan» ve «Lider» radioları da aynı vaziyetke oğradılar. «15 minut» internet neşiri ve QHA da Rusiyede qayd etip olamadılar.
Qırımtatar kütleviy haber vastaları arasında Rusiyede yalıñız «Golos Krıma» gazetası qayd oldı, gazeta rusça çıqa. Neşirniñ malümatına köre, gazetanıñ cemi olaraq 6 biñ nushası çıqacaq ve yañı adı olacaq – «Golos Krıma New»
