Link açıqlığı

Saatnıñ esas haberi

ATR yolbaşçılığı teleşirket tedbirlerini ödegeni aqta «Goskomnats» bildirüvini red etti


ATR telekanalınıñ baş müdiri Elzara İslâmova
ATR telekanalınıñ baş müdiri Elzara İslâmova

ATR qırımtatar telekanalınıñ yolbaşçılığı teleşirket tedbirlerini ödegeni aqta Qırım Cumhuriyeti milletlerara munasebetler ve sürgün olunğan grajdanlarnıñ işleri boyunca «Devlet komitetiniñ» yolbaşçılığınıñ bildirüvini red etti.

Komitetniñ matuat hızmeti bildirgeni kibi, 2014 senesi Goskomnats (o vaqıt – Reskomnats) Sürgünlik qurbanlarınıñ hatıra kününe bağışlanğan tedbirlerniñ 368,2 biñ ruble ve Qurban bayramnı, şu cümleden «Qurban küreşleri» VI halqara yarışınıñ 404,4 biñ ruble miqdarında parasını bergen eken.

Beyanatta şunı da qayd eteler ki, Goskomnats «Tatlı ses» bala televizion yarışınıñ finalını da ödemege razı edi, amma ATR tarafından «paalığa tüşken esap, şu cümdelen sesarttırıcı ve yarıq teminatınıñ, naqliyat masraflarınıñ parasını qaplağan esap berilgen edi» eken.

ATR baş müdiri Elzara İslâmova bu beyanatnı izaatlap, ayrette qalmağanını bildirdi.

«Sürgünlik qurbanlarını hatıra Kününe bağışlanğan tedbirlerge Goskomnats kerçekten de para ayırdı. Amma mında ufaq, amma pek emiyetli bir şeyni aytmağa unutqanlar. İşbu tedbirlerni sımarış ve teşkil etken ATR degil, Reskomnats edi. İcracı vazifesini Milliy küreş boyunca «Küreş» Qırım Federatsiyası becerdi, oña çeşçit hızmetlerniñ ödenilmesine 368 biñ ruble ayırıldı. ATR telekanalı sesarttırıcı, yarıq ve ve videoteminatnı bergen yardımcı oldı, montaj, demontaj, tehnikiy hızmet etüv içün bu paradan 164 biñ ruble aldı», – dedi Elzara İslâmova.

«Qurban küreşleri» yarışına kelgende, Elzara İslâmova aytqanı kiyui, o da ATR tarafından degil, Milliy küreş boyunca «Küreş» Qırım Federatsiyası teşebbüsi ile teşkil etildi. Federatsiyağa çeşit hızmetler içün 404 biñ ruble ayırılğan edi.

«ATR telekanalı kene de sesarttırıcı, yarıq ve ve vdiyeoteminatnı bergen, yarışnı videoğa çıqarğan bir eda etici oldı. Ödev miqdarı 255 biñ ruble oldı. Bundan da ğayrı, ATR Goskomnats tarafından ödenilmegen masraflarnıñ sponsorı oldı. Belli ki, bu kibi yarışnıñ keçirilüv esabı 1,5 mln rubleni teşkil ete», – dey ATR baş müdiri.

«Tatlı ses» bala yarışınıñ keçirilmesi boyunca Goskomnatsqa berilgen pek paalı esabat aqta bildirüv bizni küldürtti. O vaqıt ATR telekanalı körgen aqiqiy masraflar edi. Goskomnatsqa masraflarnıñ bir qısmı – 700 biñ rubleni ödemege teklif etken edik, muvafaqiyetsiz. «Tatlı ses» yarışınıñ final kontsertine biz 2,2 mln ruble masraf etik, umumen ise bu yarış bizge 5 millionğa tüşe. Çünki bala ve bala tedbirlerine paranı biz iç bir vaqıt acımay edik. Ve final kontsertlerge kelgen seyircilerniñ seslenüvi bunı tasdiqlar», – dey Elzara İslâmova.

Elzara İslâmova şunı da qayd etti ki, ATR telekanalında yapılğan iç bir bala, medeniy leyhağa Goskomnats qoşulmadı. Bunı, aytqanı kibi, Goskomnatstan ATR telekanalına kelgen vesiqa tasdiqlar. Sözlerine köre, ATR leyhalarınıñ parası berilüvi aqta mında bir söz bile yazılmay.

XS
SM
MD
LG