Qırım akimiyeti «içtimaiy qırımtatar teleradiokompaniyasını» teşkil etüv zaruriyeti aqta bildire. Qırımnıñ şimdiki başı Sergey Aksönovnıñ mütenasip avalesini Qırım Nazirler Şurasınıñ matbuat hızmeti aprel 2 künü aşkâr etti.
Malüm olğanı kibi, aprel 2-de, Aqmescitte «Qırım» qırımtatar milliy cemaat areketiniñ, qırımtatar cemaatçılıq temsilcileriniñ umumiy konferentsiyası keçti. Konferentsiya iştirakçileri Aksönovğa muracaat etip, Qırım territoriyasında İçtimaiy Qırımtatar teleradiokompaniyasını (OKTRK) açmağa yardım soradılar.
Aksönov Qırım ükümeti bu teklifke qol tutqanını bildirdi.
«Qırımtatar matbuat vastalarınıñ inkişafında ihtiyac olğanını añlaymız. «Pervıy krımskiy» telekanalında qırımtatar muarririyeti bar, amma bu yeterli degil. 2014 senesi aprel 21-de Rusiye Prezidentiniñ «Ermeni, bulğar, yunan, qırımtatar ve alman halqlarınıñ aqlavı ve olarnıñ inkişaf ettirilmesi aqta» Emriniñ amelge keçirilmesinde müim bir adım olacaqtır. Bunıñ ile Qırımda söz serbestliginiñ inkişafına imkân yaratılır, yarımadada barışıq, stabillikniñ olmasına isse qoşulır», – dedi Aksönov.
Onıñ sözlerine köre, soñki yılları cumhuriyetniñ haber alanındaki qırımtatar qısmı «ATR şahsiy mediaholdingi tarafından monopoliyalaştırılğan edi».
«Amma informatsion saasında demokratiya ve monopolizm birlikte olamaz. Bugün biz halq menfaatında çalışqanını degen, amma öz monopol vaziyetini siyasiy maqsatlarında qullanğan şahsiy strukturanı köremiz. Böyle areketlerniñ maqsadı añlayışlıdır: halqara cemaatçılığında akimiyet qırımtatarlarnı ana tilinde infomartsiyağa irişimsiz qaldıra, farqlı tüşüngenlerni taqip ete degen fikirni doğurmağa tırışalar»,– dedi o.
«Qırım ve Rusiyege qarşı informatsion cenkniñ bir qısmıdır. Neticede ATR mediaholdingi terkibine kirgen matbuat vastalarınıñ qullanıcıları zarar köre. Teessüf ki, balalar da zarar köre, çünki Lâle bala kanalınıñ yayınlavı da toqtaldı. Holding saipleriniñ qabaatından sebep yüz bergen bugünki vaziyet mümkün degil bir şey. Demokratik ve ahlâqiy qaidelerge uymay. Qırımlılarnıñ aqları bozulğan. Aqiqaten milliy qırımtatar telekanalınıñ teşkil etüvi qırımtatarlarnıñ ana tilinde doğru malümatnıñ elde etilmesine aqqını qorçalar ve milliy medeniyetniñ inkişafına isse qoşar», – dedi Aksönov
Malüm olğanı kibi, aprel 1-den itibaren ATR işini toqtattı. Mart ayınıñ soñuna qadar telekanal Rusiye qanunlarına köre öyle de qayd olamadı.
Telekompaniya Roskomnadzorğa vesiqalarnı bir qaç kere bergen edi, lâkin olarnı farqlı sebeplerden keri qaytarğan ediler. ATR mediaholdingine kirgen Lâle qırımtatar bala telekanalı, «Meydan» ve «Lider» radioları da aynı vaziyetke oğradılar. «15 minut» internet neşiri ve QHA da Rusiyede qayd etip olamadılar.
