Link açıqlığı

Aqyarda «Hizb ut-Tahrir» teşkilâtına alâqası olğanında şeklengen daa bir insannı yaqaladılar


Saba, aprel 2-de, Baydar köyü (Aqyar) Rusiye FSB hadimleri Ferat Sayfullayevniñ evinde tintüvni keçirip, özüni yaqaladılar.

Bunı «Vozrojdeniye» musulman neşiriniñ mühbiri Mümine Saliyeva bildirdi.

«Bugün saba 6-7 saatleri arasında Balıqlava rayonı Baydar köyündе Sayfullayevlerniñ evine tintüv ile FSB hadimleri keldi. Ferat Sayfullayevni yaqaladılar. Tafsilâtlı malümat yarın Lenina soqağında yerleşken Aqyar mahkemesinde saat 10:00 ögrenilecek», – yazdı o Facebook saifesinde.

Adliyeci Emil Kürbeinov aytqanı kibi, Baydar sakinini Rusiyede resmiy şekilde yasaqlanğan «Hizb ut-tahrir» teşkilâtına alâqası olğanında şekleyler.

Yanvar 23 künü Aqyar civarında Rusiye Federal havfsızlıq hızmetiniñ hadimleri üç insannı yaqaladı, tintüvni keçirdiler. Aynı şu künü mahkeme keçti ve yaqalanğanlarğa eki ay apis cezasını belgilerdiler.

Yaqalanğanlarnı Rusiye Federatsiyası Cinaiy kodeksiniñ 205.5 maddesini («Terroristik teşkilât faaliyetini teşkil etüv ve bunıñ kibi teşkilâtlarnıñ faaliyetinde iştirak etüv») bozğanlarında şekleyler. İşbu madde boyunca 15-20 yıllıq apis cezası ya da ömür boyu apis cezası belgilene.

Kürbedinovnıñ sözlerine köre, işbu insanlar Ukraina Havfsızlıq Hızmeti tarafından nezaret etilse de, olarnıñ Hizb ut-Tahrir teşkilâtına aitligi öyle de tasdiqalanılmadı.

XS
SM
MD
LG